Путин: Биз ҳеч ким билан уруш қилмоқчи эмасмиз. Биз билан урушиш ҳеч кимнинг хаёлига келмаслигини истаймиз

^{Фото: AP}
Владимир Путин ТАССга берган интервьюсида замонавий қуролланиш, дунёдаги стратегик мувозанат ва қуролланиш харажатлари ҳақида сўз юритди.
“Биз ҳеч ким билан уруш қилмоқчи эмасмиз. Ҳеч ким биз билан уруш қилишни ўйламаслиги учун шароит яратмоқчимиз. Бу нарса ҳеч кимнинг хаёлига келмаслиги учун. Биз фақат шуни қиляпмиз. Бугунги кунда харажатлар бўйича еттинчи ўриндамиз.

Демак, сарф-харажатлар бўйича биринчи ўринда АҚШ, иккинчи ўринда Хитой, учинчи ўринда қандай ғалати бўлмасин, Саудия Арабистони, кейин Буюк Британия, кейин Франция, Япония, улар бизни ортда қолдиришди, кейин эса биз, еттинчи ўриндамиз. Бундан ташқари, бизнинг харажатларимиз йилдан-йилга камаймоқда. Бошқа мамлакатларнинг харажатлари эса ўсиб бормоқда. Биз ҳеч ким билан уруш қилмоқчи эмасмиз, лекин бирон кимсанинг хаёлига биз билан урушиш хаёлига келмаслиги учун мудофаа соҳасида шундай вазият яратмоқдамиз”, деди у.

Унинг сўзларига кўра, Россия стратегик қуроллар бўйича рақобатчиларига етиб олган. кетган.

“Биз стратегик қурол бўйича доимо рақобатчиларимизга етиб олганмиз. Атом бомбасини дастлаб америкаликлар яратишди, биз етиб олдик. Стратегик авиация кўринишидаги транспорт воситалари - америкаликлар, биз етиб олдик. Ракеталарни дастлаб улар ясашди, биз етиб олдик. Дунёда мавжуд бўлмаган ҳужум қилувчи тизимларни биринчи бўлиб биз яратдик. Энди улар бизга етиб олмоқда. Бу умуман ноёб вазият, бунақаси илгари бўлмаган.

Биринчи навбатда, гипертовушли, жумладан, қитъалараро масофадаги зарба бериш мажмуаларини назарда тутаман. 2000 йилда бизнинг армиямизда бир миллион уч юз мингдан ортиқроқ киши бўлган, ҳозир бир миллиондан сал ортиқ. Фақат техникаларимизнинг замонавийлигини йилига бир фоиздан оширдик, замонавий техникамиз атиги 6 фоиз эди. Биласизми, ҳозир қанча? Деярли 70 фоиз”, деди Россия президенти.

Путиннинг фикрича, қурол фақат бир томонда бўлганидагина ундан ўқ узилади.

“Хавфсизлик, сиёсат соҳасида бир қоида мавжуд. Қурол фақат бир томонда бўлганидагина ундан ўқ узилади. Қўшни томонда ҳам қурол бўлса, нариги томон қуролидан фойдаланишга жазм қилмайди. Бу стратегик барқарорлик ва кучлар мувозанати деб аталади. Мана шу стратегик мувозанат туфайли дунё Иккинчи жаҳон урушидан кейин йирик ҳарбий низолардан қутулиб қолди. Айнан стратегик барқарорлик ва стратегик мувозанат эвазига.

Айтганча, ракетага қарши мудофаа тизимини яратиш орқали америкаликлар бу стратегик барқарорлик ва стратегик мувозанатни бузишни хоҳлашди. Улар ўз устиларига ракетага қарши соябон тутиб олишса, бошқа томон улар ядро қуролини қўллаганида жавоб қайтара олмайди деб ўйлашди. Аммо замонавий, жумладан, ҳар қандай ракетадан мудофаа қилиш тизимини осонгина бузиб ўтадиган мажмуалар яратиш билан биз стратегик барқарорлик ва стратегик мувозанатни сақлаб турибмиз. Бу нафақат биз, балки халқаро хавфсизлик учун жуда муҳимдир”, деди у.