Фото: REUTERSАмерикалик сенаторлар АҚШ президенти Дональд Трампни унга импичмент доирасида қўйилаётган барча айбловлар бўйича айбсиз деб топди.
Сенаторлар Трампга ҳокимиятни суиистеъмол қилиш ва конгресс олиб борган терговга қаршилик кўрсатиш бўйича қўйилаётган айбловларни кўпчилик овоз билан
рад этишди.
Биринчи айблов бўйича Трампнинг оқланиши учун 52 сенатор овоз берган, 48 сенатор уни айбдор деб топган. Иккинчи айбловда ҳам 52 сенатор уни айбсиз, 47 сенатор айбдор деб топган. Трампга қарши унинг фақат бир партиядоши – республикачи Митт Ромни қарши овоз берган.
Президент айбдор деб топилиши ва лавозимидан четлатилиши учун сенаторлардан учдан икки қисми айблов бандларидан бирига овоз беришлари талаб этилган, аммо бу рўй бермади. Шу тариқа конгрессда импичмент жараёни ўз ниҳоясига етиб, Трамп президент лавозимида қоладиган бўлди.
Дональд Трамп импичмент жараёни олиб борилган АҚШнинг учинчи президенти бўлди. Импичмент жараёни биринчи бўлиб олис 1868 йилда АҚШнинг 17-президенти Эндрю Жонсонга қарши ташкиллаштирилган. Бундай жараёнга учраган иккинчи президент 42-президент Билл Клинтон бўлган. Уларнинг иккиси ҳам оқланган.
Шунингдек, 1973 йилда 37-президент Ричард Никсонга нисбатан ҳам импичмент жараёни ташкиллаштирилган, бироқ у ўзи истеъфога чиқиб кетган.
Трампга нисбатан импичмент жараёни конгресснинг вакиллар палатасида демократлар томонидан 2019 йил 24 сентябрда АҚШ президентининг Украина президенти Владимир Зеленский билан 25 июлдаги илк телефон суҳбати билан боғлиқ ҳолда бошланган. Таъкидланишича, Трамп ўша суҳбат вақтида Зеленскийга босим ўтказиб, уни АҚШнинг собиқ вице-президенти Жо Байден ва унинг ўғли Хантерга қарши тергов бошлашга чақирган.
Шу муносабат билан демократлар кўпчиликни ташкил қилувчи вакиллар палатаси Трампга ҳокимиятни суиистеъмол қилиш ва конгрессга қаршилик кўрсатиш бўйича иккита айблов билдирган.
Иш жорий йил январда юқори палата – сенатга суд жараёни ўтказиш учун топширилган. Сенатда кўпчиликни Трампнинг партиядошлари - республикачилар ташкил қилгани сабабли унга қарши айбловлар рад этилишига шубҳа йўқ эди.