Фото: EPA/Vostock-photoУкраина Миллий хавфсизлик ва мудофаа хизмати (СНБО) «Украина халқаро авиалиниялари» авиакомпаниясининг Теҳрон яқинида ҳалокатга учраган йўловчи самолётида бўлганлар сони ҳақида маълумот берди. Самолёт Эрон пойтахтидан Киевга парвоз қилаётган эди.
Маълум қилинишича, Boeing-737 бортида жами 167 йўловчи ва экипажнинг 9 нафар аъзоси бўлган. Украина бош вазири Алексей Гончарукнинг тасдиқлашича, самолётдаги 11 киши - 2 йўловчи ва экипажнинг 9 аъзоси Украина фуқаролари эди.
Украина элчихонаси ҳозирча ушбу самолёт ҳалокати теракт оқибатида рўй бергани ҳақидаги тахминларни истисно қилган.
Ўз навбатида, Эрон нашрлари тарқатган маълумотга кўра, самолётда жами 179 киши бўлган, шундан 147 нафари эронликлар ва 32 нафар хорижлик.
Маълумотларга кўра, йўловчиларнинг аксари Канадада таҳсил олувчи эронлик талабалар бўлишган.
Эрон томони ҳалокатга самолёт двигателида ёнғин чиқиши сабаб бўлганини билдирган.
«Агар самолётни ракета урганида у ҳаводаёқ портлаган бўларди», деган Эроннинг Йўллар ва шаҳарсозлик вазирлиги расмийси Кассир Низами Boeing’га ракета урилгани ҳақидаги хабарларни рад эта туриб.
Бундан аввалроқ ижтимоий тармоқда Эронда ҳалокатга учраган самолёт йўловчилари орасида ўнлаб канадаликлар бўлгани тўғрисида тасдиқланмаган маълумот тарқалганди:
• Эрон фуқаролари - 71 нафар
• Канада фуқаролари - 73
• Германия фуқаролари - 4
• Буюк Британия фуқаролари - 3
• Швеция фуқаролари - 8
• Афғонистон фуқаролари - 6
• Украина фуқаролари - 2 нафар йўловчи ва экипажнинг 9 нафар аъзоси.