Зеленскийнинг ўзбекистонлик қиёфадошига “Квартал-95” шоусидан таклиф тушди

^{Фото: Mash}
Украинанинг “Квартал-95” шоуси муаллифлари Украина президенти Владимир Зеленскийнинг қиёфадоши, асли ўзбекистонлик бўлган, ҳозирда Москвада яшовчи Умид Исабоевга таклиф билан чиқишди. Автобўёқчи бўлиб ишловчи Исабоев Mash нашрига берган интервьюсида у билан шоу раҳбарларидан бири – Евгений Кошевой телефон орқали боғланганини маълум қилган. Ушбу шоуда ўз вақтида Зеленский бошловчилик қилган. Унинг собиқ ҳамкасби Исабоевга биргаликда кўрсатувлар олиб боришни таклиф қилган.

“Менга видеоқўнғироқ бўлди. Қарасам, Украина рақами. Нариги томонда эса, кўринишича, Евгений Кошевой эди. У менга “кел сени ўзимизга олсак, бизга қўшил”, деб айтди. “Квартал-95”га. Бирга ишлаймиз, деди. Кошевой билан кўрсатувлар олиб бориш, одамларга кулгу улашиш мақсадида”, деб маълум қилди Умид.

Исабоевнинг таъкидлашича, унинг журналистларга берган илк интервьюсидан кейин унга кинода иштирок этиш таклифлари билдирилмоқда. Жумладан, Умидга Россия сериалида Украина президенти ролини ўйнаш таклиф қилинган ва таъкидланишича, яқин кунларда бу борада шартнома имзоланади. Бироқ “Квартал-95”дан тушган таклиф ҳисобга олинса, Зеленскийнинг қиёфадоши олдида мураккаб танлов турибди. Умиднинг айишича, унинг ўзи “Квартал-95”да ишлаб кўришни истайди.