Лондон мэри Борис Жонсон Буюк Британияда истиқомат қилувчиларнинг барчаси инглиз тилида яхши гаплаша олишлари шартлигини маълум қилди. Бу ҳақида “The Telegraph” нашрига асосланиб, “РИА Новости” хабар беради.Аввалроқ, “Мустақиллик партияси” етакчиси Найжел Фараж Британия давлат соғлиқни сақлаш тизимида ишлайдиган шифокор ва тиббиёт ходимларининг инглиз тилини мукаммал билмайдиганлари ишдан бўшатилиши лозимлиги ҳақида айтиб ўтган эди. Унинг бу фикрини Борис Жонсон ҳам қўллаб-қувватлади.
“Мен Фаражнинг сўзларига тўла қўшиламан. Фуқароларимиз шифохонага кириб, у ерда шифокорларга ўз муаммоларини тушунтира олмаслиги ҳолатлари учраётганидан таажжубдаман. Бу давлатда яшайдиган, аҳолига хизмат кўрсатиш соҳаларида ишлайдиган ҳар бир одам инглизчада гаплаша олиши шарт”, – дейди Лондон мэри.
Лондон мэри ОАВлар орқали тарғиб қилинаёган мультимаданиятни ҳам танқид қилди.
“Лондонда шундай жойлар борки, у ерда яшайдиган мухожирларнинг бир неча авлоди ўз она тилларидаги медиа воситалардан фойдаланишлари туфайли инглизчада ҳали ҳам гаплашишни ўрганмаганлар. Улар инглиз тилини ўрганишга эҳтиёж ҳам сезмаганлар. Буюк Британияда инглиз тилида мулоқот қилинади. Ваҳоланки, бу тил ўрганиш қийин бўлган мураккаб тил эмас ҳам”, деб қўшимча қилди Лондон мэри.
фото: РИА Новости
манба: kun.uz