Бугун, 31 июль куни Адлия вазирлиги томонидан тизимда коррупцияга қарши курашиш борасида амалга оширилган ҳаракатлар, ушбу йўналишда қабул қилинган идоравий дастур ижросига бағишланган матбуот анжумани ўтказилди.Тадбирда тақдим этилган маълумотларга кўра, коррупциявий хавф-хатарларни баҳолаш методикаси тасдиқланиб, вазирлик таркибий бўлинмалари раҳбарлари томонидан ҳар чоракда тизим идоралари фаолиятида коррупциявий хавф-хатарларни баҳолаш амалга оширилмоқда. Шунингдек, коррупция хавф-хатарига энг кўп дуч келадиган функцияларнинг (ваколатлар) ва лавозимларнинг рўйхатини шакллантириб бориш амалиёти йўлга қўйилди ҳамда доимий таҳлил ва мониторинг асосида мазкур руйхат янгилаб борилмоқда.
Коррупциявий хавф-хатарлар даражаси юқори бўлган функциялар:
- Адлия органлари ва муассасаларига ходимларни ишга қабул қилиш;
- Адлия органлари ходимларини Тошкент шаҳрида доимий пропискага қўйиш;
- Тадбиркорлик субъектларига ягона давлат реестридан маълумотлар бериш;
- Марказ ходимларининг хатти-ҳаракатларини назорат қилиш;
- Давлат хизматлари учун тўлов қийматларининг ошкор этилиши;
- Юридик хизмат ходимларини лавозимга тайинлаш, аттестациядан ўтказиш, уларга мартаба даражаларини бериш;
- Нодавлат нотижорат ва диний ташкилотларни адлия органларига ва муассасаларига берадиган ҳисоботларни ўз вақтида тақдим этмагани учун мазкур ташкилот мансабдор шахсларига нисбатан маъмурий ҳуқуқбузарлик тўғрисидаги баённомалар расмийлаштириш;
- Нодавлат нотижорат ташкилотларининг чет эллик шахслардан пул маблағлари ва мол-мулк олишни рўйхатдан ўтказувчи орган билан келишиш;
- Идоравий норматив-ҳуқуқий ҳужжатларни ҳуқуқий экспертиза ва давлат рўйхатидан ўтказиш;
- Давлат хариди предмети ва нархини шакллантириш, харид тўғрисидаги эълон бериш, иштирокчиларининг таклифларини қабул қилиш.
Лавозимлар
- Нотариал идоралар ходимлари;
- Давлат хизматлари марказлари ходимлари;
- Суд экспертлар;
- Хўжалик ишлари бўлимларида ишловчи ходимлар;
- Нотариал идоралар фаолиятини мувофиқлаштирувчи ходимлар;
- Кадрлар билан ишловчи бўлинмалар ходимлари;
- Вазирлик тизимидаги таълим мусассасалари педагог ходимлари;
- Юридик хизмат фаолиятини назорат қилувчи бўлинмалар ходимлари.