Путин президентлик ваколатини тугатганидан сўнг нима билан шуғулланади?

^{Фото: TV Sentr}
Россия президенти Владимир Путин ўз президентлик ваколати тугаганидан сўнг нима билан шуғулланишини айтишга ҳали эрта деб ҳисоблайди. «ТАСС»нинг хабар беришича, президент бу ҳақда Италияга ташрифида Corriere della Sera газетасига берган интервьюсида маълум қилган.

«Бу ҳақида гапиришга ҳали эрта. Олдинда яна беш йил тинимсиз ишлар кутиб турибди ва дунёнинг жадал суратларда ривожланиш шароитида прогнозлар қилиш қийин», — деган у.

Путиннинг кетма-кет 6 йиллик президентлик ваколати муддати 2024 йилда тугайди. Россия конституциясига кўра, бир шахс икки даврдан ортиқ муддатга президентлик қила олмайди.

Путин аввал ҳам 2000 йилдан 2008 йилгача икки марта кетма-кет 4 йил муддатли президентлик лавозимини эгаллаган эди. Кейин эса бу лавозимни тарк этиб, 4 йил бош вазир лавозимида ишлаган.