Футбол бўйича Европа Чемпионлар лигасининг 2018/2019 йилги мавсуми финал учрашуви 1 июнь, шанба куни Тошкент вақти билан 00:00 да бошланади. Ғолиблик учун Англиянинг «Ливерпуль» ва «Тоттенҳэм» жамоалари ўзаро кураш олиб боради.Финал олдидан Repost нашри ўзбекистонлик амалдорлар ўртасида сўров ўтказди. Унда, жумладан, Ўзбекистон бош прокурори Отабек Муродов, Ёшлар Иттифоқи раиси Қаҳрамон Қуронбоев, АКТ вазири биринчи ўринбосари Олимжон Умаров, Олий Мажлис Қонунчилик палатаси депутати Расул Кушербаев ҳам қатнашган.
Отабек Муродов, бош прокурор: «Футболни жуда яхши кўраман, лекин мусобақани кузатиб боришга амалда имкон бўлмаяпти. Шанба куни бўладиган ўйинни кўришга ҳаракат қиламан, албатта. ‘Ливерпуль’га мухлислик қиламан, чунки бу катта тажриба ва нуфузга эга кучли жамоа».
Қаҳрамон Қуронбоев, Ёшлар Иттифоқи раиси: «Менинг тахминим — ‘Ливерпуль’ 3:1 ҳисобида ғалаба қозонади. Агар ўйин куни Тошкентда бўлсам, финални албатта томоша қиламан».
Расул Кушербаев, депутат: «‘Ливерпуль’га мухлислик қиламан. Кўп йиллардан бери ушбу жамоа ўйинларини кузатиб келаман. Клубнинг барча футболчилари орасида Муҳаммад Салоҳни энг яхшиси, деб ҳисоблайман».
Олимжон Умаров, АКТ вазири биринчи ўринбосари: «15 ёшимдан бери ‘Ливерпуль’га мухлислик қиламан, шу боис финалда ҳам айнан уларга мухлислик қиламан».