Қозоғистоннинг Биринчи президенти Нурсултон Назарбоев 3 апрелда марказда йиғилиш ўтказди.“Мен тегишли қонун билан тартибга солинувчи Биринчи президент – Элбоши мажбуриятларини бажаришга киришдим. Бундан ташқари, Хавфсизлик кенгаши, Қозоғистон халқи ассамблеяси раиси ҳисобланаман, Nur Otan партиясига бошчилик қилмоқдаман. Олдинда кўп иш бор. Ушбу ишларни амалга ошириш учун Биринчи президент девонхонаси ташкил этилди. Барча ташкилий масалалар ҳал қилинган. Энди барча зиммамга юкланган вазифаларни бажаришга киришишим лозим”, деб айтиб ўтган Назарбоев.
Йиғилишда Биринчи президент девонхонаси раҳбари, Биринчи президент ёрдамчиси, девонхона бўлимлари, Биринчи президент кутубхонаси ва жамғармаси раҳбарлари иштирок этишган.
Йиғилишда Назарбоевга девонхонанинг фаолияти бошланиши билан боғлиқ ташкилий-ҳуқуқий тадбирлар якунлангани маълум қилинган ҳамда ходимларни танлаш натижалари ҳақидаги маълумот тақдим қилинган.
Манба: Kun.uz