Фото: Google ImagesҲаваскор бокс бўйича Осиё чемпиони, Рио Олимпиадаси кумуш медаль соҳиби, жаҳон чемпионати совриндори Бектемир Мелиқўзиев фаолиятини профессионал боксда давом эттирадиган бўлди. Бу ҳақда GoSport хабар берди.
Сўнгги вақтларда -81 кг вазн тоифасида жангларда иштирок этиб келаётган Мелиқўзиев куни кеча АҚШга жўнаб кетган. Бектемир Мелиқўзиев у ерда »Мир бокса» промоутерлик компанияси билан шартнома имзолаши кутилмоқда.
Маълумот учун, мазкур промоутерлик компаниясида бугунги кунда ўзбекистонлик бир қатор боксчилар, жумладан Шаҳрам Ғиёсов (7 та жанг, 7 та ғалаба, 6 та нокаут), Муроджон Аҳмадалиев (5 та жанг, 5 та ғалаба, 4 та нокаут), Исроил Мадримов (2 та жанг, 2 та ғалаба, 2 та нокаут) ва Баҳодир Жалолов (5 та жанг, 5 та ғалаба, 5 та нокаут) шуғулланиб келишмоқда. Бектемир айнан мана шу компания билан шартнома тузаётган навбатдаги ўзбекистонлик спортчи бўлади.
Эслатиб ўтамиз, аввалроқ ҳаваскор бокс бўйича жаҳон чемпионати йўлланмасини тақдим этувчи Осиё чемпионати учун Ўзбекистон терма жамоаси таркиби эълон қилинган ва ундан Бектемир Мелиқўзиев ўрин олмаганди.