Англия Кубогининг чорак финалидан ўрин олган «Суонси» – «Манчестер Сити» учрашуви ўз ниҳоясига етди. «Либерти Стэдиум»да кечган баҳсда меҳмонлар иродали ғалабани қўлга киритишди.
Ўйин тенг курашлар остида бошланган бўлсада биринчи бўлиб гол уриш мезбонларга насиб этди. 20-дақиқада Граймз пенальтини аниқ бажариб, жамоасини олдинга олиб чиқди. Орадан кўп ўтмай Целина ҳисобни 2:0 кўринишига келтирди.
Иккинчи бўлимда манкунианлар босимни кучайтиришди ва бир нечта ўзгаришларни амалга оширишди. 69-дақиқада Бернарду Силва ҳисобни қисқартирган бўлса, 78-дақиқада меҳмонлар пенальтини голга айлантиришди. Серхио Агуэронинг 11 метрдан йўллаган зарбаси рақиб посбонига тегиб дарвозадан жой олди.
88-дақиқада Агуэро қанотдан узатилган тўпни боши билан дарвозага жойлаб қўйди ва жамоасига муҳим ғалабани олиб келди. Шу тариқа, «Манчестер Сити» драматик руҳда кечган баҳсда қийин ғалабани қўлга киритди ва ярим финалга йўл олди.