Тошкент шаҳри Юнусобод тумани Отчопар-2 маҳалласида янги бизнес маркази қурилади. Бу ҳақда Yunusabad Business City’да вақтинчалик директор вазифасини бажарувчи Умид Умаров маълум қилган. «Аҳолини жойлаштириш бўйича ҳаракат режасини бошладик. Замонавий уй–жойларни барпо этиш учун тайёргарлик ишлари олиб борилмоқда», – деган Умид Умаров «BUSINESS CITY» лойиҳаларининг тақдимоти вақтида.
Kun.uz нашри хабар қилишича, маҳаллий аҳолига икки ҳудуддаги турар-жойлар таклиф этилади. Улар Сергели туманидаги янги кўп қаватли хонадонларга ёки Юнусобод туманидаги 20 гектар майдонли турар-жойга кўчишлари мумкин бўлади.
Отчопар-2 маҳалласида одатий икки қаватли коттеж уйлар барпо этилади. Шунингдек, уйнинг ўрнига компенсация тўловини ҳам қабул қилиш мумкин.
Yunusabad Business City 45,5 гектар майдонда қурилиши режалаштирилган. У савдо мажмуалари, бизнес офислари, кўнгилочар боғлар, турар-жойлар ва бошқа объектлардан иборат бўлади.
Бошланғич ҳисоб-китобларга кўра, лойиҳа қиймати 500 миллион долларни ташкил этиб, у 2019-2023 йиллар давомида амалга оширилади.