13 ёшли мактаб ўқувчиси ота-онасининг эътиборини тортишга қарор қилиб, ўзининг ўғирланишини ташкиллаштирди, деб хабар бермоқда ИИББ матбуот хизмати.29 январь куни Миробод тумани ИИО ФМБга 13 ёшли Ойқиз Б.нинг 39 ёшли отаси Умид Г. мурожаат қилган. У қизининг мактаб дарсларидан кейин уйига қайтмаганлигини айтган.
Ўша куннинг ўзида соат 15:00да қизнинг онасининг телефонига қуйидагича хабар келган: “агар қизингни кўришни истасанг, мен айтадиган пулни олиб кел, бўлмаса уни кўрмайсан”.
ИИББ ходимлари томонидан ўтказилган тезкор-қидирув натижасида вояга етмаган қизнинг жойлашган жойи аниқланган. Қизни “Чилонзор” метро бекатига яқин жойдан топишган.
Аниқланишича, қизни ҳеч ким ўғирламаган, хабарни эса ўзи юборган. Қиз ушбу ҳаракатини унга ота-онасининг эътибори етмаётганлиги, пулни эса муҳтожларга бермоқчи бўлгани билан изоҳлаган.
Ҳозирда қиз ва унинг ота-онаси билан профилактик суҳбатлар ўтказилмоқда.