Украиналик шоумен ва актёр Владимир Зеленский Украинадаги президент пойгасида етакчилик қилмоқда. Бундан “Рейтинг” ижтимоий гуруҳи ўтказган сўровнома маълумотлари дарак бермоқда. Тадқиқотга кўра, уни сўралганларнинг 19 фоизи қўллаб-қувватламоқда. Рейтингнинг 2-ўрнини собиқ бош вазир Юлия Тимошенко эгалламоқда, унга 18,2 фоиз респондентлар овоз беришга тайёр. Амалдаги президент Пётр Порошенкони 15,1 фоиз иштирокчи қўллаб-қувватлаган.
Аҳоли ўртасида энг катта қўллаб-қувватловга эга номзодлар бешталигига “Мухолиф платформа – Ҳаёт учун” партияси раисларидан бири Юрий Бойко (10 фоиз) ва “Фуқаролик позицияси” етакчиси Анатолий Гриценко (8,5 фоиз) ҳам кирган.
Тадқиқотга кўра, 41 ёшли Зеленский мамлакат жануби ва шарқида катта қўллаб-қувватловга эга, Киевда у Порошенко билан етакчилик қилмоқда, Бойко Донбассда, Тимошенко эса мамлакат маркази ва шимолида юқори электорат кўрсаткичларига эга.
Сўровнома 18 ёшдан катта бўлган 6 минг киши ўртасида 16-24 январь кунлари олиб борилган.
Украинанинг таҳлил ва прогнозлаштириш институти томонидан 17-25 январь кунлари ўтказилган сўровнома эса бошқа натижаларни кўрсатган: номзодлар ўртасида Тимошенко етакчилик қилмоқда (20 фоиз), 2-ўринни Зеленский (12,6 фоиз), 3-ўринни Порошенко (11,9 фоиз) эгалламоқда.
Украина президенти сайловлари 31 март куни бўлиб ўтади, сайлов кампанияси эса 2018 йил 31 декабрда старт олган.