Озарбайжон президенти Илҳом Алиевнинг қизлари пул ювишга кўмак берганликда гумонланмоқда. Бу ҳақда Британиянинг The Guardian газетаси суд баёнотига асосан хабар берди. Тергов маълумотларига кўра, Лайло ва Орзу Алиевалар Лондондаги нуфузли кўчмас мулкни Child&Child компаниясидан офшор компаниялар орқали 60 миллион фунт стерлингга сотиб олишга уринишган.Guardian маълумотларига қараганда, гап Лондоннинг Найтсбриж туманидаги иккита квартира ҳақида кетмоқда, улар қиролича қароргоҳи - Букингем саройига бевосита жуда яқин ерда жойлашган. Уларни сотиб олиш учун Британия Виргин оролларидаги офшор компаниядан фойдаланиш режалаштирилган бўлиб, уни британиялик ҳуқуқшунос Ҳолид Шариф Панаманинг Mossack Fonseca фирмасидан харид қилган. Бу компания OCCRP журналистларининг коррупцияга қарши кенг кўламли суриштирувларида қайд этилганди.
2016 йилда битим бекор қилинди, ўшанда Mossack Fonseca - «Панама досье»си - тўғрисида суриштирувлар эълон қилингач, Алиевлар оиласи аъзолари катта миқёсда пул ювишда гумонланди.
Хабар қилинишича, суд Шарифга Алиевлар пули қаердан келиб чиққанини текширмагани учун 45 минг фунт стерлинг ва қўшимча 40 минг фунт стерлинг миқдорида жарима солди. Британия қонунчилигига биноан, мамлакатда мулк сотиб олган шахслар сиёсатга алоқадор бўлса, бундай текширувлар мажбурийдир. Тергов маълумотларига кўра, Шариф буни рад этган, ўз ёрдамчисини Озарбойжон президентининг қизлари сиёсат билан боғлиқ эмаслиги ҳақида декларацияга қайд киритишга мажбурлаган.
Mossack Fonseca тўғрисидаги суриштирувлар 2016 йилда эълон қилинганидан сўнг, Алиевлар оиласи Лондон, Москва, Дубай ва Прагада кўчмас мулк сотиб олиш учун офшор компаниялар тармоғидан фойдаланганликда гумонланди.