Букингемширда яшовчи 82 ёшли Барбара Уитакер испан сюрреалист рассоми Жоан Миронинг бир неча млн долларга баҳоланган сурати сирини топди.Рассомнинг “Тун бағридаги аёл” картинаси билан боғлиқ мазкур янгилик тадқиқотчилар учун кутилмаган ҳолатни юзага келтирди.
Бундан бир муддат илгари “Telegraph” газетаси рассомнинг 18 млн АҚШ долларига баҳоланган “Тун бағридаги аёл” картинаси юзасидан ўқувчилар ўртасида сўров ташкил этган. Унда нима сабабдан картинадаги тун оқ рангда, осмондаги эгри-бугри белгилар нимани англатади каби саволлар берилган.
Картинани савдога қўяётган “Phillips” аукцион уйи экспертлари ўз изоҳларида суратдаги айри чизиқни уриб туширилган учоқ тутуни сифатида қайд этиб келганлар. Чунки бу сурат рассомнинг Иккинчи Жаҳон уруши даврида яратган асарлари сериясига киради.
Аммо картинани синчиклаб ўрганган Барбара Уитакер бу борадаги ўз хулосасини таҳририятга йўллаган. “Мен сурат чизишни умуман билмайман. Аммо осмондаги айри ёзув рассомнинг ўз исми бўлиши керак, деб уйлайман” деб ёзган у. Барбара Уитакер таҳририятга юборган иловасида “Миро” сўзини кўриш мумкин.
Таҳририят бу таҳминни текшириш учун “Phillips”га мурожаат қилган. Экспертлар рассомнинг 14 та суратини ҳам синчков текширувдан ўтказиб, бундай белгилар бошқа суратларда ҳам борлигини топишган. Миро ўз картиналарида бир нечта пиктограмма ёки идеограммалар қўллаб келгани аниқланган.
Энди "Phillips” экспертлари Миро бундай пиктограммалардан қандай ва нима мақсадда фойдалангани бўйича янги тадқиқотларни бошлади.
“Тун бағридаги аёл” 15 ноябрда Нью-Йоркда ўтказиладиган аукционда сотилади. Ўтган йил Жоан Миронинг “Аёл ва қуш”(1940 йил) картинаси 24,6 млн фунт стерлингга сотилиб, мазкур валюта савдосида рекорд ўрнатган. Унинг энг қиммат асари “Картина (Кўк юлдуз)” абстракцияси бўлиб, баҳоси 36,9 млн долларга етган.