БМТ аёлларнинг ниқоб кийиб юргани учун жаримага тортган Франция инсон ҳуқуқларини поймол қилган, деб ҳисобламоқда. Бирлашган Миллатлар Ташкилотининг инсон ҳуқуқлари бўйича қўмитасидагилар бу тақиқ мусулмон аёлларининг ибодат эркинлигига путур етказади, деган хулосага келишган.2016 йилда инсон ҳуқуқлари бўйича қўмитага юзни беркитиш имконини берувчи кийим кийиб юргани учун жаримага тортилган икки нафар аёлдан шикоят келиб тушган.
Францияда эса 2010 йилда «ҳеч ким оммавий муҳитда юзни беркитиш учун мўлжалланган кийим ёки буюм кийиб юриши мумкин эмас»лигини назарда тутувчи қонун қабул қилинган.
Қўмитанинг хулосасига кўра, омма олдида ниқоб (бурқа) кийиб юриш учун умумий тақиқ мусулмон аёлларининг ҳуқуқларини поймол қилади. Франция мазкур кийимни тақиқлаш нечоғлик зарур эканлигини етарли тарзда тушунтириб бера олмаган. Бу хавфсизлик нуқтаи назаридан эканлиги қўмитани қаноатлантирмаган.
БМТдагилар тақиқ ўта радикал эканлигини тан олишган. Давлатлар фақат шахсни аниқлаштириш учун юзни кўрсатишни талаб қилишга ҳақли. Энди 180 кун ичида Франция ҳокимияти БМТ Инсон ҳуқуқлари бўйича Олий комиссар бошқармасига ҳисобот топшириши ва шикоят қилган аёлларга компенсация тўлаб бериши лозим бўлади.