Су-24 самолёти қулаши оқибатида унинг ҳар иккала учувчиси ҳалок бўлган. Бу ҳақда, Sky News’га асосланиб, «Газета.ru» хабар бермоқда.
Аввалроқ CNN Turk мухбири Эзги Жанкуртаран Twitter’даги саҳифасида Сурияда қулаган Россиянинг Су-24 самолёти учувчиларидан бири ҳалок бўлганини маълум қилганди.
24 ноябрь куни тонгда Туркия—Сурия чегарасида Россиянинг Су-24 самолёти уриб туширилди. Туркиянинг таъкидлашича, самолёт мамлакат ҳаво кенгликларини бузиб ўтган. Россия Мудофаа вазирлигининг қайд этишича, Россия самолёти Туркия ҳудудига кирмаган.
Россия президенти Владимир Путин Су-24 самолёти қулашини «террорчиларнинг шериклари томонидан орқадан берилган зарба» деб атади.
Манба: Daryo.uz