Хонанда Муниса Ризаева шу йилнинг 19-21 октябрь кунлари пойтахтимиздаги "Истиқлол" санъат саройида яккахон концерт дастурини тақдим этди, деб ёзмоқда uz24.uz сайти.
Концерт дастурининг учинчи куни (21 октябрь) хонанданинг таваллуд кунига тўғри келганлиги боис, концерт cўнгида фан клуб аъзолари ва концерт режиссёри хонандага совғалар билан бир қаторда кичик бир "сюрприз"ни тақдим этишди.
“Даракчи” нашрининг берган хабарига кўра, режиссёр Рустам Шамсиддинов ва фан клуб аъзолари томонидан тайёрланган “сюприз видео” саҳнадаги катта экранда намойиш этилган ва унда Россия эстрада юлдузларидан Филипп Киркоров, Стас Михайлов, Ани Лорак, Валерий Леонтьев, Николай Басков ва бошқалар Муниса Ризаевани туғилган куни билан табриклашган ва бу вақтда хонанда қувониб саҳнада ёш боладек сакраган, бу ҳолатни мухлислар ҳам олқишлаб туришган. Аслида Россиянинг бир қатор юлдузлари томонидан юборилган табриклар Лолита ва Ирина Аллегровага аталгани ва мазкур видеоролик сохталаштирилгани бир неча кундан сўнг маълум бўлган.
Мазкур видеороликни концерт меҳмони бўлишган бир қатор хонандалар ўз Инстаграм саҳифаларига ҳам жойлаштиришган ва Инстаграм фойдаланувчилари томонидан аёвсиз муҳокама қилинганидан сўнг бу видеоролик жойланган саҳифалардан йўқолиб қолган.
“Мунисанинг концертидаги сохта табрикдан муддао нима?”, деб ёзади нашр.