«Барселона» ҳужумчиси Неймар «ПСЖ» билан шахсий шартнома борасида келишувга эришган.Marca нашри тарқатган хабарга кўра, футболчининг отаси парижликлар жамоаси спорт директори Антеро Энрике ҳамда бошқарув кенгаши раиси Софи Жордан билан учрашиб, шартноманинг охирги бандларини муҳокама қилиб олган.
Ушбу трансфер «ПСЖ»га 400 млн еврога тушади. Клуб Неймарнинг трансфери учун 222 млн евро тўлайди, футболчининг ўзи эса 6 йиллик шартнома имзолаб, жами 180 млн евро ишлаб олади.
Ўтган ҳафтада Неймар жамоасини ўзгартирмоқчи экани, бу унинг каталонияликлар жамоасида «Месси соясида қолиб кетаётгани» билан изоҳлангани ҳақида хабарлар тарқалди.
«Барселона» ўз етакчисини сақлаб қолишни истамоқда, аммо охирги хабарларга кўра, томонларнинг музокаралари муваффақиятсизликка учраган.
Неймар «Барселона» таркибида 2013 йилдан буён ўйнамоқда. У жами 186 ўйинда майдонга тушиб, 105 та гол урган ва 80 та голга ҳаммуаллифлик қилган.