Ўзбекистон Вазирлар Маҳкамаси 1 февраль куни хўжалик субъектларига чет эл валютаси тушумини мажбурий сотиш тартибларига ўзгартишлар киритди. Бу ҳақда «Газета.uz»нинг ҳукуматдаги манбаси маълум қилди.Бунгача марказлаштирилмаган экспорт фаолиятини амалга оширувчи корхоналар хорижий валютадаги тушумларининг 50 фоизини ваколатли банкларга мажбурий равишда сотган бўлса, эндиликда маҳсулотлар ва хизматлар сотувидан тушган валютанинг фақатгина 25 фоизини мажбурий тартибда сотади.
Истисно тариқасида 16 турдаги маҳсулот ва хизмат экспортидан тушган валютанинг 50 фоизини сотиш мажбурлиги сақланиб қолади. Мазкур рўйхатдан буғдой, табиий газ ва нефтьгаз соҳасининг бошқа маҳсулотлари (шу жумладан транзити), уран, полиэтилен, полипропилен, қора металлар, мис ва рух, водород, нодир газлар ва бошқа металлмаслар, қимматбаҳо бўлмаган металлар ва бошқалар ўрин олган.
Рўйхатдан авиатранспорт хизматлари, темир йўл транспорти хизматлари, телекоммуникацион ва банк хизматлари ҳам ўрин олган.
Эслатиб ўтамиз, тайёр маҳсулотларни экспорт қилувчи текстил соҳаси корхоналари ва ўзлари ишлаб чиқарган маҳсулот ҳамда хизматлар экспортини амалга оширувчи кичик бизнес субъектлари валюта тушумини мажбурий сотишдан озод қилинган.