Ўзбекистон – Сурия учрашувидан кейин бўлиб ўтган матбуот анжуманининг иккинчи қисмида Ўзбекистон миллий терма жамоаси бош мураббийи Самвел Бабаян журналистларнинг саволларига жавоб берди.“Энг аввало, бизни қўллаб-қувватлаб тургани учун мухлисларга миннатдорчилик билдирмоқчиман. Йигитлар ғалаба қозониб, байрамни давом эттириш учун қўлдан келган барча ишни қилишди.
Ушбу босқични ғалаба билан бошлаб олдик. Ҳайдаров ва Аҳмедовларга алоҳида миннатдорчилик билдираман. Улар кичик жароҳатлари бўлсада, матонат кўрсатиб, бор имкониятларини ишга солиб, жамоага ёрдам берди.
Сурия жуда яхши жамоа. Бу ҳақида олдин ҳам айтиб ўтгандим. Балки, маҳорат борасида улар бироз тажрибасиздирлар. Бироқ, курашиш борасида улар жуда яхши таассурот қолдирди.
Биз деярли ярим йиллик танаффусдан сўнг расмий ўйин ўтказдик ва муҳими ғалаба қозондик.
Афсуски, баъзи футболчиларимиз ҳали тўлиқ формага киришиб кета олмадилар. Умид қиламанки, улар кейинги ўйинга тайёр ҳолга келадилар.
Гейнрих ҳали қариб қолгани йўқ. У захирадан тушиб, ўйинни ўзгартириб юбора оладиган футболчи. Унинг паспортдаги ёшини менга аҳамияти йўқ. Муҳими, у терма жамоа учун борини беришга тайёр.
Ҳозирдан бошлаб Қатарга қарши тайёргарлик кўришни бошлаймиз. Эртага тикланиш машқларини бажарамиз. Қатарга 4 сентябрь куни жўнаб кетамиз. Ўша ўйинда бизга Кримец ҳам ёрдам бериши мумкин бўлади. Кейинги ўйин жуда муҳим ҳисобланади.
Биз охиригача кураша оламиз", - дейди Ўзбекистон миллий терма жамоамиз бош мураббийи Самвел Бабаян.
Манба: www.the-uff.com